Plantun de Prouvènço

Pèr coumpara dos planto d'encò nostre

Sisymbrella aspera & Cyperus esculentus

Sisymbrella aspera

Brassicaceae Cruciferae

Nom en français : Cresson rude.

Descripcioun :
Lou creissoun-rufe trachis dins li relarg bagna l'ivèr, coume li mueio, roubino e ermas. Li fueio soun proun descoupado (fotò) e sènso péu. Se recounèis subretout à si silico enarcado e cuberto de berrugo (fotò).

Usanço :
Couneissèn pas d'usanço particuliero pèr aquelo planto. Soun bessai li meme que li dóu gènre proche Rorippa.

Port : Erbo
Taio : 5 à 30(50) cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Sisymbrella
Famiho : Brassicaceae
Famiho classico : Cruciferae

Coulour de la flour : Jauno
Petalo : 4
Ø (o loungour) flour : 7 à 8 mm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Mai à juliet

Liò : Mueio - Ermas - Ribiero - Roubino
Estànci : Mesoumediterran à Mountagnard
Couroulougi : Paleoutemperado
Ref. sc. : Sisymbrella aspera (L.) Spach, 1838 (= Rorippa aspera (L.) Maire, 1927 )

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.